غزل

محمد مختار علی (جدہ) سعودی عرب ۲۰۱۰ ء

 غرورِ عشق یہاں میرؔ سے زیادہ ہے

مرا جنوں، مری تقدیر سے زیادہ ہے

              بنے بنائے ہوئے گھر اُجڑتے جاتے ہیں

              یہ رنج حسرتِ تعمیر سے زیادہ ہے

مرے عُدو مری للکار سے لرزتے ہیں!!

سخن کا دَائرہ  شمشیر سے زیادہ ہے

              ہے خاکداں سے اُدھر میرا انتظار مگر

              یہ فاصلہ مری زنجیر سے زیادہ ہے

قبولِ حرفِ دُعا کو سَند کا شوق نہیں

مرا یقیں تری تاخیر سے زیادہ ہے

              ہمارا خواب اَدھورا ہے عمر بھر کیلئے !

              یہ غم فسانۂ تعبیر سے زیادہ ہے

ہمیں چراغِ سخن کی ذرا سی لو مختارؔ

ریال و منصب و جاگیر سے زیادہ ہے